اتر پردیش
اعظم-عبداللہ سے متعلق تین مقدمات کی سماعت ملتوی
(پی این این)
رام پور: ایس پی لیڈر اعظم خان اور ان کے بیٹے عبداللہ اعظم خان کے خلاف درج تین مقدمات کی سماعت نہیں ہو سکی۔ تینوں کیسز میں مختلف تاریخیں موصول ہوئی ہیں۔ایس پی رہنما اعظم خان کے خلاف تھانہ سول لائنز میں درج کوالٹی بار پر قبضے کے کیس کی کوئی سماعت نہیں ہوئی۔اس معاملے میں گواہ اور مدعی گگن اروڑہ کو گواہی کے لیے عدالت میں پیش ہونا تھا لیکن وہ عدالت میں حاضر نہیں ہوئے جس پر کیس کی سماعت نہ ہوسکی۔ عدالت نے آئندہ سماعت کے لیے 25 اپریل کی تاریخ مقرر کی ہے۔ اس کے علاوہ اعظم خان کے بیٹے عبداللہ اعظم کے خلاف درج دو پین کارڈ اور دو پاسپورٹ کے معاملے میں بھی سماعت نہیں ہو سکی۔ ان دونوں کیسوں کی سماعت 16 اپریل کو ہوگی۔ پاسپورٹ کیس میں ایس پی لیڈر اعظم خان کا نام بھی ہے۔