بٹلہ ہاؤس انکاﺅنٹر معاملہ: انسپکٹر موہن چند شرما قتل کیس میں عارض خان مجرم قرار

 (پی این این)

نئی دہلی: دہلی کی ساکیت عدالت نے 2008 میں بٹلہ ہاؤس انکاؤنٹر کیس میں ملوث دہشت گرد ارعارض خان کو مجرم قرار دیا ہے ۔ عدالت نے کہا کہ پراسیکیوٹرز اس موقع پرعارض عرف جنیدکے موقع واردات پر موجود ہونے کو ثابت کرنے میں کامیاب رہا۔ عدالت نے سزا کے فیصلے کے لئے 15 مارچ کی تاریخ طے کی ہے۔معلومات کے مطابق 2008 کے بٹلہ ہاؤس انکاﺅنٹر میں دہلی پولیس کے اسپیشل سیل میں تعینات، انسپکٹر موہن چند شرما دہشت گردوں کی فائرنگ میں مارے گئے تھے اور دو دیگر پولیس اہلکار زخمی ہوگئے تھے۔ 19 ستمبر ، 2008 کو ، 44 سالہ موہن چند شرما کو تین گولیوں کا نشانہ بنایا گیا تھا جب وہ جنوبی دہلی کے بٹلہ ہاؤس میں چھپے ہوئے پانچ مشتبہ دہشت گردوں کو پکڑ رہے تھے۔ بعد ازاں وہ علاج کے دوران اسپتال میں ہی دم توڑ گئے تھے۔عدالت نے آج عارض خان کو قتل ، اقدام قتل ، سرکاری ملازمین پر حملہ ، سرکاری ملازم کے کام میں رکاوٹیں ڈالنے ، اسلحہ ایکٹ سمیت ایک سرکاری اہلکار کو شدید زخمی کرنے کے الزامات میں سزا سنائی۔ عدالت نے تفتیشی افسر کو ہدایت دی ہے کہ وہ دہلی پولیس کے اسپیشل سیل کے شہید انسپکٹر موہن چند شرما اور دو زخمی پولیس اہلکاروں کے کنبہ ، معاشرتی اور معاشی حالات کے بارے میں معلومات دیں۔ عدالت نے کہا ہے کہ اس کے مطابق متاثرہ خاندان کے اہل خانہ کو معاوضہ دینے پر غور کیا جائے گا۔اس سے قبل 2013 میں ایک دہشت گرد شہزاد احمد کو اس معاملے میں سزا سنائی جاچکی ہے۔ بٹلہ ہاؤس انکاﺅنٹر کے دوران ، دونوں فرار ہونے میں کامیاب ہوگئے ، جبکہ ان کے تین ساتھی عاطف آمین ، محمد سیف اور محمد ساجد پولیس کے ہاتھوں مارے گئے۔غور طلب ہے کہ 2008 میں دہلی ، جے پور ، احمد آباد اور یوپی عدالتوں میں ہوئے دھماکوں میں عارض خان مرکزی سازش کار ہے۔ ان دھماکوں میں 165 افراد ہلاک اور 535 زخمی ہوئے تھے۔ اس وقت عارض خان پر 15 لاکھ روپے کا انعام تھا اور اس کے خلاف انٹرپول کے ذریعہ ریڈ کارنر نوٹس جاری کیا گیا تھا۔اعظم گڑھ سے تعلق رکھنے والے عارض خان عرف جنید کو فروری 2018 میں اسپیشل سیل کی ٹیم نے گرفتار کیا تھا۔