(پی این این)
دیوبند:ایڈیشنل چیف جوڈیشل مجسٹریٹ اے سی جے ایم پرویندر سنگھ کی عدالت نے 1993 میں دیوبند میں پیش آئے بم دھماکے کے مقدمے میں مبینہ حزب المجاہدین سے وابستہ نذیر احمد وانی کو عدم شواہد کی بنیاد پر بری کر دیا ہے۔ عدالت نے قرار دیا کہ پولیس ملزم کے خلاف کوئی ٹھوس ثبوت پیش کرنے میں ناکام رہی، جس کا فائدہ ملزم کو دیتے ہوئے اسے تمام الزامات سے باعزت بری کر دیا گیا۔
یاد رہے کہ 1992 میں بابری مسجد کی شہادت کے بعد 1993 میں دیوبند کے یونین چوراہے پر ایک بم دھماکہ ہوا تھا، جس میں دو پولیس اہلکاروں سمیت تقریباً چھ افراد زخمی ہوئے تھے۔ اس واقعے کے بعد پولیس نے مقدمہ درج کرتے ہوئے جموں و کشمیر کے ضلع بڈگام کے رہائشی نذیر احمد وانی کو ملزم نامزد کیا تھا۔ اور اسے مختلف سنگین دفعات کے تحت گرفتار کر کے جیل بھیج دیا گیا تھا۔ کچھ عرصے بعد وانی کو عدالت سے ضمانت مل گئی، تاہم وہ طویل عرصے تک عدالت میں پیش نہیں ہوا، جس پر نومبر202 میں اس کے خلاف ناقابلِ ضمانت وارنٹ جاری کیے گئے۔
پولیس اور انسدادِ دہشت گردی فورس اے ٹی ایس نے کارروائی کرتے ہوئے اسے دوبارہ کشمیر سے گرفتار کیا اور حزب المجاہدین کا دہشت گرد قرار دیتے ہوئے اس کی گرفتاری کو بڑی کامیابی کے طور پر میڈیا میں پیش کیا گیا۔ جنوری2025 میں ایک بار پھر اسے عدالت سے ضمانت مل گئی۔ گزشتہ 31 برسوں سے یہ مقدمہ دیوبند کی اے سی جے ایم عدالت میں زیرِ سماعت رہا، تاہم اس دوران پولیس ملزم کے خلاف ایسے شواہد پیش نہ کر سکی جن سے اس کی مجرمانہ سرگرمی ثابت ہو سکے۔ منگل کے روز دیوبند عدالت نے تمام دلائل مکمل ہونے کے بعد وانی کو ثبوتوں کے فقدان کی بنیاد پر بری کر دیا۔

(ایجنسیاں)
تہران :ایران نے اسرائیل پر جوابی حملے میں 100 سے زائد ڈرونز داغے ہیں۔ اسرائیلی فوج (IDF) نے دعویٰ کیا ہے کہ ان کے لڑاکا طیارے راستے میں ڈرون کو مار گرا رہے ہیں۔ اب تک ایک بھی ڈرون اسرائیلی سرحد تک نہیں پہنچا ہے۔ صورتحال مکمل طور پر قابو میں ہے۔
آج صبح اسرائیل نے 200 لڑاکا طیاروں سے ایران پر حملہ کیا۔ نیویارک ٹائمز کے مطابق اسرائیلی فوج نے تہران کے ارد گرد کم از کم 6 فوجی ٹھکانوں کو نشانہ بنایا ہے۔ ان 6 میں سے 4 مقامات پر جوہری اڈے بھی موجود ہیں۔
ایران کے سرکاری میڈیا نے تصدیق کی ہے کہ اسلامی انقلابی گارڈ کور (IRGC) کے کمانڈر حسین سلامی اسرائیلی حملے میں ہلاک ہو گئے ہیں۔
الجزیرہ کے مطابق اس حملے میں دو ممتاز ایرانی جوہری سائنسدان محمد مہدی تہرانچی اور فردون عباسی بھی مارے گئے ہیں۔
اسرائیل نے دعویٰ کیا ہے کہ اس حملے میں ایران کے آرمی چیف محمد باقری، دیگر اعلیٰ فوجی افسران اور کچھ سینئر جوہری سائنسدان بھی مارے گئے ہیں۔
ادھر ایران کے سپریم لیڈر آیت اللہ خامنہ ای نے کہا کہ ہماری فوج اسرائیل کو سزا کے بغیر نہیں جانے دے گی۔

(پی این این)
رام پور: ممبر پارلیمنٹ مولانا محب اللہ ندوی رضا لائبریری پہنچےجہاں انہوں نے ڈائریکٹر رضا لائبریری ڈاکٹر پشکر مشرا کو ان کے روس کے سفر کے لئے مبارک باد دی۔ ان کی کوششوں کی تعریف کی۔کہا ان کی کوششوں کے نتیجہ میں رضا لائبریری دنیا کے نقشے پر دکھائی دینے لگا ہے جو رام پور والوں کے لئے فخر کی بات ہے۔
ممبر پارلیمنٹ نے کہا کہ ڈاکٹر پشکر مشرا کی قیادت میں رضا لائبریری آگے بڑھ رہی ہے اگر اسی طرح سے کام ہوتا رہا تو وہ دن دور نہیں جب رضا لائبریری دنیا کے نقشے پر ہوگی۔انہوں نے ڈاکٹر پشکر مشرا کو اس بات کی مبارک باد دی کہ ان کی قیادت میں رضا لائبریری کے سبھی مذاہب وملت کے لوگوں کے لئے کام کر رہی ہے اور ان کو نئے راستے دکھا رہی ہے۔ اس موقع پر ممبر پارلیمنٹ نے کہا کہ رضا لائبریری ریسرچ کرنے والوں اور نوجوانوں کو ایک اسٹیج فراہم کر رہی ہے جس کے ذریعہ وہ اپنی قابلیت میں اضافہ کر سکتے ہیں۔
انہوں نے رضا لا تبریری میں ہورہےکاموں کی تعریف کی۔کہا کہ یہاں دنیا کی نایاب چیزیں ہیں کتابوں کا نایاب ذخیرہ ہے۔ اس موقع پر ڈائریکٹر لائبریری ڈاکٹر پشکر مشرا نے ممبر پارلیمنٹ مولانا محبّ اللہ ندوی کا استقبال کرتے ہوئے کہا کہ ان کو امید ہے کہ ان کا تعاون رضا لائبریری کو ملتا رہے گا۔