(پی این این)
نئی دہلی :شاہی امام مسجد فتح پوری مولانا ڈاکٹر مفتی محمد مکرم احمدنے جمعہ کی نماز سے قبل خطاب میں مسلمانوں سے پرزور اپیل کی کہ نوجوانوں کی دینی تعلیم و تربیت کی طرف خصوصی توجہ دیں نوجوان ہمارے مستقبل کا سرمایہ ہیں ان کی نگہداشت میں لا پرواہی شدید نقصان کا باعث ہوگی۔
انہوں نے کچھ لیڈروں اور تنظیموں کی طرف سے مسلسل مسلمانوں کے خلاف اشتعال انگیزی کی شدید مذمت کی اور ان کے خلاف سپریم کورٹ کی ہدایات کے مطابق کارروائی کا مطالبہ کیا ۔غازی آباد میں اکثریتی فرقہ کے درمیان تلواریں تقسیم کیے جانے کی بھی انہوں نے مذمت کی اور کہا ہمیں امید ہے کہ غیر قانونی طور پر تلوار یں تقسیم کرنے والوں پر جلد کارروائی ہوگی اور امن برباد کرنے والوں کو بخشا نہیں جائے گا۔ غازی آباد کے ڈاسنہ میں یتی نر سنگھا نند سرسوتی نے اپنی عادت کے مطابق ایک بار پھر اکثریتی فرقہ کو اکساتے ہوئے آئی ایس آئی ایس جیسی تنظیم بنانے کا مطالبہ کیا۔ یتی نرسنگھانند نے کہا کہ ہندوؤں کو اب خود کش دستے بنانے چاہئیں ۔ مفتی مکرم نے کہا کہ بھارت میں ہر فرقہ کے لوگ یکجہتی اور محبت کے ساتھ رہتے آئے ہیں اور آگے بھی سب مل جل کر رہنا چاہتے ہیں فرقہ پرستی پھیلانے والے اور اشتعال انگیزی کرنے والے بہت کم ہیں وہ کبھی اپنے ناپاک عزائم میں کامیاب نہیں ہوں گے۔ بھارت کی گنگا جمنی تہذیب صدیوں پرانی ہے یہ ملک کی شان ہے۔
غزہ میں اسرائیلی فوج کے مسلسل حملوں اور جنگ بندی کے خلاف ورزی کے باوجود امن منصوبہ جلد دوسرے مرحلے میں داخل ہونے والا ہے مفتی مکرم نے کہا غزہ کی وزارت صحت میں شعبہ نگہداشت وفارمیسی کے ڈائریکٹر نے اپنے بیان میں کہا کہ دواؤں اور طبی ساز و سامان کی کمی کے باعث دو لاکھ مریض اور 10 ہزار آپریشن متاثر ہو سکتے ہیں جبکہ قابض اسرائیل اب بھی طبی امداد کی ترسیل روک رہا ہے مفتی مکرم نے یو این او اور عالمی برادری سے مطالبہ کیا کہ غزہ کے باشندوں پر ظلم و ستم کو بند کرایا جائے اور جنگ بندی کی خلاف ورزی بند کرائی جائے۔

(پی این این)
نئی دہلی :دہلی حکومت آلودگی کے ذرائع کی نشاندہی کرنے اور ان کے اثرات کا اندازہ لگانے کے لیے مصنوعی ذہانت (AI) کا استعمال کرنے کے لیے IIT کانپور کے ساتھ ممکنہ تعاون پر غور کر رہی ہے۔ ایک سرکاری بیان میں کہا گیا ہے کہ محکمہ ماحولیات تعاون کے لیے روڈ میپ، ادارہ جاتی طریقہ کار اور مرحلہ وار نفاذ پر بات چیت کے لیے پوری طرح تیار ہے۔د
ہلی کے وزیر ماحولیات منجندر سنگھ سرسا نے اس نئی پہل کی وضاحت کرتے ہوئے کہا، “ہم ایک ایسے ماڈل کی طرف بڑھ رہے ہیں جہاں فیصلے نہ صرف رد عمل پر مبنی ہوں گے بلکہ حقیقی وقت کے اعداد و شمار، ماخذ کی شناخت، اور قابل پیمائش نتائج پر بھی مبنی ہوں گے۔مجوزہ تعاون کا مقصد دہلی کے آلودگی کے ذرائع کی تفصیل سے شناخت کرنے، ان کے اثرات کا اندازہ لگانے، اور تمام شعبوں میں ٹارگٹڈ، بروقت مداخلتوں کو لاگو کرنے کی صلاحیت کو مضبوط کرنا ہے۔ انہوں نے کہا کہ توجہ ایسے نظاموں کی تعمیر پر ہے جو مسلسل نگرانی، تجزیہ، پیشن گوئی اور کارروائی کی رہنمائی کر سکے۔
اس نقطہ نظر کا ایک اہم ستون متحرک ماخذ کی تقسیم ہے، جو حکام کو سائنسی طور پر دھول، نقل و حمل، صنعت، بایوماس جلانے، اور علاقائی عوامل کے تعاون کی نشاندہی کرنے میں مدد کرے گا۔سرسا نے کہا کہ یہ ثبوت ایجنسیوں کو پابندیوں اور رد عمل کا سہارا لینے کے بجائے آلودگی کے منبع پر کارروائی کرنے کے قابل بنائے گا۔مجوزہ تعاون ملٹی ایجنسی کوآرڈینیشن پر بھی زور دیتا ہے، اس بات کو یقینی بناتے ہوئے کہ میونسپل باڈیز، ضلعی انتظامیہ، نفاذ کرنے والی ایجنسیاں، اور تکنیکی ادارے ایک مشترکہ ڈیٹا پلیٹ فارم پر واضح طور پر بیان کردہ کرداروں اور جوابدہی کے ساتھ کام کریں۔
سرسا نے کہا، “جب ہر ایجنسی ایک ہی سائنسی ثبوت کی بنیاد پر کام کرتی ہے، تو کارروائی تیز، زیادہ درست اور زیادہ موثر ہوتی ہے۔ اس طرح ہم دہلی کو آگ بجھانے سے حقیقی روک تھام میں تبدیل کرنا چاہتے ہیں۔”دہلی حکومت بیک وقت چار اہم محاذوں پر کام کر رہی ہے: گاڑیوں کی آلودگی، دھول پر قابو، آلودگی پھیلانے والی صنعتیں، اور کچرے کا انتظام۔تعمیراتی مقامات پر دھول کے سخت ضابطے، مکینیکل روڈ سویپنگ، اینٹی سموگ گنز، اور بجلی کے کھمبوں پر مسسٹ اسپرے سسٹم مؤثر طریقے سے ہوا سے پیدا ہونے والے ذرات سے نمٹ رہے ہیں۔ڈسٹرکٹ مجسٹریٹ اور ڈویژنل کمشنر کے زیر نگرانی سروے آلودگی پھیلانے والی صنعتوں کے خلاف کارروائی کر رہے ہیں، جبکہ تمام لینڈ فل سائٹس پر گلیوں کا کچرا جمع کرنے اور بائیو مائننگ کے ذریعے روزانہ تقریباً 35 میٹرک ٹن لیگیسی ویسٹ پراسیس کیا جا رہا ہے، جس سے کچرے کے ڈھیر میں نمایاں کمی ہو رہی ہے۔

(پی این این)
نئی دہلی:دہلی کے لیفٹیننٹ گورنر وی.کے سکسینہ نے سالوں قدیمی روایت کوبرقرار رکھتے ہوئے حضرت خواجہ معین الدین حسن چشتیؒ کے814ویں عرسِ مبارک کے پُرنور موقع پرعقیدت واحترام کے ساتھ چادرِ شریف پیش کی۔اس روحانی اورباوقارموقع پرخواجہ غریب نوازؒ کی درگاہ سے وابستہ عالمگیر پیغامِ محبت، امن اورانسانیت کوخراجِ عقیدت پیش کیا گیا۔
اس موقع پر راج نواس میں منعقد دہلی کے ایل جی نے ایک خصوصی وفد کو چادر شریف پیش کی اورملک میں امن وسلامتی کی خاص دعاء کی اپیل کی۔ اس دوران عرس کمیٹی دہلی کے سابق چیئرمین ایف۔ آئی اسماعیلی،محمدمصطفی، پرویزنور،وقاربھوپالی، اسلام الدین،مونابھائی،حافظ محمدغفران نقشبندی شریک ہوئے۔ چادر پوشی کے اس عمل کو روحانی روایات کے مطابق انجام دیاگیا،جسکے دوران ملک میں امن،بھائی چارے اورہم آہنگی کیلئے خصوصی دعائیں کی گئیں۔
ایل جی وی۔کے سکسینہ نے اس موقع پر اظہارِ خیال کرتے ہوئے کہا کہ خواجہ معین الدین چشتیؒ کی تعلیمات آج کے عہدمیں بھی نہایت اہم ہیں،کیونکہ وہ محبت،رواداری،خدمتِ خلق اورانسان دوستی کادرس دیتی ہیں۔ انہوں نے کہا کہ صوفیائے کرام کے پیغامات نے ہمیشہ ہندوستان کی گنگا جمنی تہذیب کو مضبوط کیا ہے اورمختلف مذاہب و طبقات کے درمیان اتحاد و یگانگت کوفروغ دیا ہے۔ایل جی نے ملک اوربالخصوص دہلی کے عوام کیلئے امن،خوشحالی اور ترقی کی دعا کی اور اس امیدکااظہارکیا کہ خواجہ غریب نوازؒ کی تعلیمات سے رہنمائی حاصل کرتے ہوئے معاشرے میں نفرت،تعصب اور تفرقہ کے خاتمے میں مدد ملے گی۔تقریب کے اختتام پر قومی یکجہتی، باہمی احترام اورسماجی ہم آہنگی کے عزم کااعادہ کیا گیا، جبکہ شرکاء نے اس روحانی موقع کو ایمان افروز اور دلوں کو جوڑنے والاقرار دیا۔