سرکار بنی تو آسام میں دہلی کی طرح ہوگی ترقی : کجریوال

(پی این این )

نئی دہلی :عام آدمی پارٹی کے قومی کنوینر اور دہلی کے وزیر اعلی اروند کیجریوال اور آسام کے وزیر اعلی ہمانتا بسوا سرما کے درمیان ٹویٹر پر ترقی کو لے کر جنگ ابھی ختم ہوتی نظر نہیں آ رہی ہے۔

 گزشتہ کئی دنوں سے دونوں ریاستوں کے لیڈران ایک دوسرے پر شدید حملے کر رہے ہیں۔ کجریوال نے اتوار کو کہا کہ جب آسام میں عام آدمی پارٹی کی حکومت بنے گی تو وہ دہلی کی طرح وہاں بھی ترقی کریں گے۔اروند کیجریوال پر تازہ حملہ کرتے ہوئے آسام کے وزیر اعلیٰ ہمانتا بسوا سرما نے اتوار کو دعویٰ کیا کہ کیجریوال دہلی کو لندن یا پیرس بنانے کا اپنا وعدہ پورا نہیں کر سکے جس کے بعد وہ قومی دارالحکومت کا موازنہ چھوٹے شہروں سے کر رہے ہیں۔ سرما نے کہا کہ دہلی کے وزیر اعلیٰ نے اب آسام کا دورہ کرنے کی خواہش ظاہر کی ہے اور انہوں نے انہیں ایسے وقت میں آسام آنے کو نہیں کہا جب ریاست سیلاب جیسی تباہی سے دوچار تھی۔ہمنتا بسوا سرما نے ٹویٹ کیا، "آپ دہلی کو لندن اور پیرس جیسا بنانے کے وعدے کے ساتھ اقتدار میں آئے اروند کجریوال جی کو یاد ہے؟ اگر وہ کچھ نہ کر سکے تو دہلی کا موازنہ آسام اور شمال مشرق کے چھوٹے شہروں سے کرنے لگے! میرا یقین کریں۔

 اگر بی جے پی کو دہلی جیسا شہر اور وسائل ملتے ہیں، تو پارٹی اسے دنیا کا سب سے خوشحال شہر بنائے گی۔اس کے جواب میں کیجریوال نے بھی ٹوئٹ کیا۔ اور کہا کہ یقین مانیں جب آسام میں آپ کی حکومت بنے گی تو ہم وہاں بھی دہلی کی طرح ترقی کریں گے۔

 کرپشن ختم کر دیں تو وسائل کی کمی نہیں ہو گی۔دونوں وزرائے اعلیٰ کے درمیان لفظوں کی جنگ اس وقت شروع ہوئی جب کیجریوال نے ٹوئٹر پر ایک خبر شیئر کی، جس میں کہا گیا تھا کہ ناقص نتائج کی وجہ سے آسام حکومت نے 34 اسکولوں کو بند کر دیا ہے۔ اس خبر کو شیئر کرتے ہوئے عام آدمی پارٹی کے کنوینر نے کہا کہ اسکول بند کرنا کوئی حل نہیں ہے۔