ستیندر جین کو وزارت سے ہٹائیں گے کجریوال؟

(پی این این )

نئی دہلی:ہائی کورٹ نے منی لانڈرنگ کیس میں درج دہلی کے وزیر صحت ستیندر جین کی برطرفی کے لیے دائر درخواست کو خارج کرتے ہوئے اسے اپنے دائرہ اختیار سے باہر قرار دیا ہے۔ ہائی کورٹ نے کہا کہ وزیر اعلیٰ کو اس پر غور کرنا پڑے گا۔ عدالت نے کہا کہ یہ چیف منسٹر کا کام ہے کہ وہ عوام کے مفاد میں صحیح فیصلہ لیں اور اس بات پر غور کریں کہ مجرمانہ پس منظر یا اخلاقی پستی کے ملزم کو وزیر کے طور پر مقرر کیا جانا چاہئے اور اسے برقرار رکھا جانا چاہئے۔

لائیو لا کے مطابق، ہائی کورٹ نے کہا کہ عدالت کا کام وزیر اعلیٰ کو ہدایات دینا نہیں ہے، بلکہ اس کا فرض ہے کہ اہم عہدوں پر فائز لوگوں کو ہمارے آئین کے اصولوں کو برقرار رکھنے میں ان کے کردار کی یاد دہانی کرائی جائے۔ عدالت نے مزید مشاہدہ کیا کہ وزیر اعلیٰ کابینہ کے ارکان کے انتخاب اور وزراءکی کونسل کی تقرری کے حوالے سے پالیسی بنانے کے لیے اپنا استحقاق استعمال کرتے ہیں۔

بی جے پی لیڈر اور سابق ایم ایل اے نند کشور گرگ نے عدالت میں عرضی دائر کی تھی جس میں ستیندر جین کو کابینہ سے ہٹانے کا مطالبہ کیا گیا تھا۔ چیف جسٹس ستیش چندر شرما اور جسٹس سبرامنیم پرساد کی بنچ نے درخواست کو خارج کر دیا۔ بی جے پی لیڈر گرگ نے عرضی میں کہا تھا کہ جین آئینی حلف لینے کی وجہ سے سرکاری ملازم ہیں۔

 جین منی لانڈرنگ کے الزام میں قید ہونے کے باوجود ایک وزیر کو ملنے والی مراعات اور سہولیات سے لطف اندوز ہو رہے ہیں۔اس سے پہلے 7 جولائی کو عدالت نے جین کو ان کے عہدے سے ہٹانے کا حکم دینے سے انکار کر دیا تھا۔

 عدالت نے کہا کہ ہم اپنی حدود جانتے ہیں۔ ہمیں قوانین، قواعد اور نوٹیفیکیشن کی پابندی کرنی ہوگی۔ ہم اس سے آگے نہیں جا سکتے۔ ہم قانون بنانے والے نہیں ہیں۔” ستیندر جین کو 30 مئی کو گرفتار کیا گیا تھا۔ تاہم وہ اب بھی دہلی کے وزیر صحت کے عہدے پر فائز ہیں۔ بی جے پی-کانگریس کی طرف سے انہیں عہدے سے ہٹانے کا مسلسل مطالبہ کیا جا رہا ہے۔