اپنا دیشتازہ ترین خبریں

کشمیر: سبزی، پھل اور مرغ کی قیمتیں آسمان پر، لوگ پریشان

وادی کشمیر میں جاری نامساعد اور غیر یقینی صورتحال کے بیچ جہاں لوگ گوناگوں مشکلات سے دوچار ہیں وہیں اشیائے خوردنی بالخصوص سبزیوں کی قیمتوں میں روز افزوں ہورہے اضافے سے لوگوں کی زندگیاں اجیرن بن گئی ہیں۔بتادیں کہ وادی میں گزشتہ دو ماہ سے جاری نامساعد صورتحال کے بیچ اشیائے خورد ونوش کی قیمتوں میں بے تحاشا اضافہ ہو رہا ہے جس کے باعث عام لوگوں کے مشکلات ہر گزرتے دن کے ساتھ دوچند ہورہے ہیں۔

میڈیا کے ایک نمائندے نے بدھ کی صبح جب بازار کا دورہ کرکے سبزیوں کی تازہ ریٹ معلوم کی تو تمام تر سبزیوں کی قیمتوں میں ہوشربا اضافہ پایا۔انہوں نے کہا کہ بازاروں میں کشمیری ساگ 60 تا 70 روپے فی کلو، مرغ 160 تا 170 روپے فی کلو، گوشت 500 روپے فی کلو، ٹماٹر 60 تا 70 روپے فی کلو، پیاز 60 تا 70 روپے فی کلو، بینز 40 تا 50 روپے فی کلو، گوبھی 40 تا 50 روپے فی کلو اور شلجم 40 تا 50 دستیاب تھیں جبکہ کیلے 80 تا 100 روپے فی درجن، سیب 80 روپے فی کلو اور سنترے 80 تا 160 روپے فی درجن دستیاب تھے۔

فیاض احمد نامی ایک شہری نے بتایا کہ وادی میں حالات خراب ہونے کے ساتھ اشیائے خوردنی میں یکایک اضافہ ہونے لگا۔ انہوں نے کہا: ‘وادی میں حالات خراب ہونے کے ساتھ ہی اشیائے خورد ونوش کی قیمتوں میں اضافہ ہونے لگا، سبزیوں کی قیمیتوں میں خاص طور پر آئے روز بے تحاشا اضافہ ہورہا ہے، منہ مانگی ریٹ پر سبزیاں دستیاب ہیں ‘۔ فدا محمد نامی ایک شہری نے کہا کہ یوں تو یہاں قومی شاہراہ بند ہونے کے بعد اشیائے خوردنی کی قیمتوں میں اضافہ ہورہا تھا لیکن اب یہاں موسم گرما میں بھی حالات کے بیچ سبزیوں کے دام آسمان چھو رہے ہیں۔ ان کا کہنا تھا: ‘وادی کو بیرون ملک کے ساتھ جوڑنے والی سری نگر۔ جموں قومی شاہراہ بھاری برف باری کی وجہ سے بند ہوجاتی تھی تو یہاں اشیائے خوردنی کی قیمتوں میں اضافہ ہورہا تھا لیکن امسال موجودہ حالات کے پیش نظر یہاں اشیائے خوردنی خاص کر سبزیوں کے دام اس قدر بڑھ گئے ہیں کہ عام انسان کے بس سے باہر ہے ‘۔

محمد اشرف نامی ایک شہری نے کہا کہ سبزیوں کی قیمتوں میں اضافہ ہورہا ہے کیونکہ متعلقہ محکمہ خواب خرگوش میں مست ہے۔انہوں نے کہا: ‘وادی میں سبزیوں کی قیمتوں میں روز افزوں اضافہ ہورہا ہے، اس کی بینادی وجہ یہ ہے کہ متعلقہ محکمہ خواب خرگوش میں مست ہے سبزی فروشوں کا کوئی پوچھنے والا نہیں ہے، وہ منہ مانگی قیمتوں پر گاہکوں سے سبزیوں کے دام وصولتے ہیں ‘۔ فردوس احمد نامی ایک شہری نے کہا کہ سبزیوں کی قیمتوں میں اضافہ لوگوں کے لئے ایک اور مشکل ہے۔ انہوں نے کہا: ‘وادی میں لوگ ایک طرف گوناگوں مسائل سے دوچار ہیں تو دوسری طرف سبزیوں کی قیمتوں میں اضافہ ایک اور مشکل ہے، مارکیٹ میں چکنگ اسکاڈ بھی کہیں نظر نہیں آرہا ہے جس کا یہ لوگ بھر پور فائدہ اٹھا رہے ہیں ‘۔

قابل ذکر ہے کہ وادی میں نامساعد حالات کے بیچ اگر چہ لوگوں کو اشیائے خورد ونوش کی قلت کا سامنا نہیں ہے لیکن اشیائے خوردنی بالخصوص سبزیوں کی قیمتوں میں بے تحاشا اضافہ ہو رہا ہے اور پھلوں کے دام بھی ہر گزرتے دن کے ساتھ آسمان کو چھورہے ہیں جس سے عوام وخواص کی پریشانیاں مزید دو چند ہو رہی ہیں۔

اور دیکھیں

متعلقہ مضامین

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Close