کانجھا والا واقعہ کی تحقیقات میں آیا نیا انکشاف

نئی دہلی :دہلی کوہلا کر رکھ دینے والے کانجھا والا واقعے کی تحقیقات جیسے جیسے آگے بڑھ رہی ہیں، آئے روز کوئی نہ کوئی نیا انکشاف ہو رہا ہے۔ ایسا ہی ایک چونکا دینے والا انکشاف ہوا ہے، جس کی وجہ سے تحقیقات کا رخ بدلنے کی قیاس آرائیاں کی جا رہی ہیں۔ واقعے کے دن سے لے کر 5 جنوری تک پولیس جو کہہ رہی تھی کہ کار میں پانچ افراد سوار تھے، وہی پولیس اب کہہ رہی ہے کہ کار میں صرف چار لوگ تھے۔ جانتے ہیں وہ ملزم کون ہے جس کی موجودگی کی بات پہلے کی جا رہی تھی لیکن اب پتہ چلا ہے کہ وہ حادثے کے وقت گاڑی میں نہیں تھا۔کیس کی ابتدائی تفتیش میں جن پانچ افراد کو ملزم بنایا گیا ہے وہ پولیس کو مسلسل مختلف بیانات دے رہے ہیں۔ ایسے میں اصل حقائق آہستہ آہستہ سامنے آرہے ہیں۔ یہی وجہ ہے کہ اب یہ بات سامنے آئی ہے کہ واقعے کی رات کار میں صرف چار افراد سوار تھے۔ یہ بات ایک حالیہ سی سی ٹی وی فوٹیج سے بھی واضح ہو گئی ہے۔ دراصل واقعہ کی رات دیپک اپنے گھر پر تھا، اسے بعد میں بلایا گیا۔جیسا کہ پولس نے اپنی پریس کانفرنس میں واضح کیا کہ واقعہ کی رات امیت گاڑی چلا رہا تھا نہ کہ دیپک۔ امیت کے پاس ڈرائیونگ لائسنس بھی نہیں تھا۔ جب امیت نے سارا واقعہ اپنے بھائی انکش کو بتایا تو اس نے دیپک کو فون کرنے اور گاڑی چلانے کو کہنے کا مشورہ دیا۔ اس کے بعد دیپک کو گھر سے بلایا گیا۔تازہ ترین سی سی ٹی وی فوٹیج میں ڈرائیور کے علاوہ باقی تین ملزمان کار سے اترتے ہوئے نظر آ رہے ہیں۔ اسی دوران ایک اور شخص جو گاڑی کے آنے سے پہلے وہاں کھڑا تھا جا کر ڈرائیور کے ساتھ والی سیٹ پر بیٹھ گیا۔ بتایا جا رہا ہے کہ یہ شخص ملزم دیپک ہے، جس کی گاڑی چلانے کا دعویٰ کیا جا رہا تھا۔کار کے مالک آشوتوش نے بھی پولیس کو ابتدائی تفتیش میں بتایا تھا کہ دیپک نے کار اس سے لی تھی، جب کہ سچائی یہ ہے کہ امیت نے کار اس سے لی تھی اور اس نے واردات کو انجام دیا تھا۔ معلوم ہوا ہے کہ کار کے مالک آشوتوش کو چھٹا ملزم بنایا گیا ہے، جسے آج پولیس نے گرفتار کر لیا۔ ملزم آشوتوش کی گاڑی لے کر گیا تھا۔ آشوتوش پر ملزم کی مدد کرنے کا الزام ہے۔ پولیس کے مطابق واردات کے وقت کار میں صرف 4 ملزمان تھے، دیپک گھر پر تھا، لیکن امیت نے اسے بعد میں فون کیا۔