’میں امت شاہ سے دہلی پر کھلی بحث کیلئے تیار ہوں‘

نئی دہلی (انور حسین جعفری)
دہلی کے وزیر اعلی اروند کجریوال نے آج شاہین باغ کی سڑک بند ہونے کو بی جے پی کی سیاست بتایا۔ انہوں نے وزیر داخلہ امت شاہ کو نشانہ بناتے ہوئے کہا کہ دہلی کے لوگ ملک کے وزیر داخلہ امت شاہ جی سے جاننا چاہتے ہیں کہ آپ شاہین باغ کی اس بند سڑک کو کیوں نہیں کھول رہے ہیں، آپ اس پر گھناؤنی سیاست کیوں کر رہے ہیں؟۔ آپ جان بوجھ کر صرف اور صرف دہلی کے اقتدار پر قبضہ کرنے کیلئے شاہین باغ جانے والی سڑک کو خالی نہیں کرا رہے ہیں اور وہاں رہنے والے لوگوں کی زندگیوں کو اجیرن بنا رہے ہیں۔

وزیر اعلی اروند کجریوال آج پارٹی دفتر میں پریس کانفرنس سے خطاب کر رہے تھے۔ انہوں نے کہا کہ ہمارے چیلنج کرنے کے بعد بھی بی جے پی نے اپنے وزیر اعلی کے امیدوار کے نام کا اعلان نہیں کیا۔ یہ انتہائی افسوس کی بات ہے کہ بی جے پی کو وزیر اعلی کیلئے کوئی چہرہ نہیں مل رہا۔ انہوں نے کہا کہ وزیر داخلہ امت شاہ کہہ رہے ہیں کہ دہلی کے عوام کو بی جے پی کو ووٹ دینا چاہئے اور وہ فیصلہ کریں گے کہ وزیر اعلی کون بنے گا۔ دہلی کے عوام انہیں ایسے خالی چیک کیسے دے دیں۔ دہلی کے لوگ احمق نہیں ہیں۔

کجریوال نے کہاکہ امت شاہ کہہ رہے ہیں کہ آپ مجھے ووٹ دو، میں وزیراعلیٰ بناؤں گا۔ لہذا میں امت شاہ کو ہر مسئلے پر بحث کی دعوت دیتا ہوں۔ امت شاہ جی، جب بھی آپ کہتے ہیں، میں دہلی کے عوام کے ساتھ ان کے ساتھ ہر معاملے پر بحث کرنے کو تیار ہوں۔ بحث کے بعد عوام خود فیصلہ کریں گے کہ کون بہتر مفاد میں اپنے مفادات کا تحفظ کرسکتا ہے۔ کجریوال نے کہا کہ میں نے کل بھی کہا تھا کہ بی جے پی اور عام آدمی پارٹی نے اپنا منشور جاری کیا ہے اور اب دہلی کے عوام جانتے ہیں بی جے پی سے وزیر اعلی کے عہدے کا چہرہ کون ہے؟ دہلی کے عوام دونوں پارٹیوں کے وزیر اعلی کے امیدواروں کے ساتھ بات چیت کرنا چاہتے ہیں۔ دونوں سے سوالات پوچھنا چاہتے ہیں۔ لہذا اب بی جے پی کو اپنے وزیر اعلی کے امیدوار کے نام کا اعلان کرنا چاہئے تاکہ دونوں پارٹیوں کے رہنماؤں کے مابین بحث ہوسکے۔ انہوں نے کہاکہ میں کھلی بحث کے لئے تیار ہوں۔

کجریوال نے کہا کہ امت شاہ کہہ رہے ہیں کہ آپ مجھے ووٹ دو اور میں فیصلہ کروں گا کہ وزیر اعلی کون بنے گا۔ اگر امت شاہ نے کسی بے وقوف شخص کو وزیر اعلی بناتے ہیں تو دہلی کے عوام کو دھوکہ دیا جائے گا۔ دہلی کے لوگ احمق نہیں ہیں۔ بنا کسی تحریر کے خالی چیک کیسے دیدیں۔